हेटौंडा ।
आगामी आर्थिक वर्षको नयाँ बजेटमार्फत सरकारले अवलम्बन गरेका आर्थिक तथा सामाजिक नीतिहरू नागरिकको हित अनुकूल नभएको भन्दै नेपाली कांग्रेस मकवानपुरले असन्तुष्टि जनाएको छ । जनजीवनलाई प्रत्यक्ष असर पार्ने आधारभूत क्षेत्रहरूमा अतिरिक्त आर्थिक भार थपिएको भन्दै दलले सोमबार जिल्ला प्रशासन कार्यालयमार्फत संघीय सरकारलाई आफ्नो असहमति पत्र पठाएको हो । बुद्ध लामाको नेतृत्वमा प्रशासन पुगेको टोलीले राज्यले जनताका आधारभूत आवश्यकतामा बढाएको वित्तीय दायित्व तत्काल फिर्ता लिन र नागरिक अधिकारको सम्मान गर्न जोडदार आग्रह गरेको छ ।
पार्टीले विशेष गरी नागरिकका नैसर्गिक अधिकारका रूपमा रहेका शैक्षिक र उपचार सेवामा थपिएका महँगीका प्रावधानहरू तत्काल सच्याउन माग गरेको छ । ऊर्जा क्षेत्रको आन्तरिक खपत बढाउनु पर्ने बेलामा उल्टै महसुल वृद्धि गर्ने रणनीतिको आलोचना गर्दै कांग्रेसले उठिबासको जोखिममा रहेका सीमान्तकृत समुदायको आवासको हकलाई पहिला सुरक्षित गर्न सरकारलाई सचेत गराएको छ । वैकल्पिक प्रबन्ध विना गरिने कुनै पनि बलपूर्वक विस्थापन मानवीय मूल्य मान्यता विपरित हुने ठहर गर्दै कांग्रेसले वार्ता र सहमतिको बाटो रोज्न सुझाएको छ ।
यसैबीच, मुलुकको सार्वभौमिकता र छिमेकी देशसँगको सीमा विवादका विषयमा देशको कार्यकारी प्रमुखबाट व्यवस्थापिकामा व्यक्त विचार अपरिपक्व र राष्ट्रिय संवेदनशीलता विपरित रहेको कांग्रेस मकवानपुरको निष्कर्ष छ । सीमा क्षेत्रका विषयमा जनमानसमा भ्रम छर्ने गरी आएका अभिव्यक्तिप्रति जिम्मेवारी लिन वा गल्ती सच्याउन चेतावनी दिँदै दलले यी जनसरोकारका मुद्दाहरूमा सरकार गम्भीर नभए चरणबद्ध रूपमा सडक संर्घषमा उत्रिने संकेत समेत गरेको छ ।
