सिंहदरबारभित्रका सरकारी कार्यालयहरूमा प्रशासनिक झन्झटसँगै भौतिक संरचनाका कारण सेवा पाउन सास्ती भोग्दै आएका अशक्त, ज्येष्ठ नागरिक र अपाङ्गता भएका व्यक्तिहरूका लागि अब सिंहदरबारको यात्रा सहज बन्ने भएको छ। सरकारले सिंहदरबारभित्रै ह्वीलचियर र प्रत्येक ह्वीलचियरका साथमा एक जना सहयोगी (सहजकर्ता) रहने विशेष सेवाको औपचारिक सुरुवात गरेको छ। मुख्यसचिव सुमनराज अर्यालले बुधबार प्रधानमन्त्री तथा मन्त्रिपरिषद्को कार्यालयबाट यस मानवीय र कानुनी दायित्व बोकेको सेवाको शुभारम्भ गर्नुभएको हो।
यो कदमले सिंहदरबार पुग्ने सेवाग्राहीलाई मात्र नभई त्यहाँ कार्यरत अपाङ्गता भएका राष्ट्रसेवक कर्मचारीहरूलाई समेत ठूलो राहत दिनेछ। अब सिंहदरबार प्रवेश गरेपछि सम्बन्धित कार्यकक्ष वा शाखासम्म पुग्नका लागि कसैको सहारा खोज्नुपर्ने वा भर्याङ र गल्लीहरूमा अलमलिनुपर्ने बाध्यता अन्त्य भएको छ। प्रवक्ता हेमराज अर्यालका अनुसार तोकिएका सहजकर्ताहरूले आगन्तुक र कर्मचारी दुवैलाई सुरक्षित रूपमा कार्यकक्षसम्म पुर्याउने र आवश्यक सहयोग गर्ने जिम्मेवारी पाएका छन्। यस व्यवस्थाले अपाङ्गता भएका व्यक्तिहरूको अधिकार सम्बन्धी ऐन र स्थापित कानुनहरूको व्यावहारिक कार्यान्वयनलाई बलियो बनाएको छ।
राज्यको केन्द्रीय प्रशासनिक सचिवालयलाई पूर्ण रूपमा ‘अपाङ्गमैत्री’ बनाउने अभियान अन्तर्गत सिंहदरबारका अधिकांश कार्यालयका संरचनाहरू परिमार्जन भइसकेका छन् भने बाँकी ठाउँमा पनि तीव्र रूपमा काम भइरहेको छ। केन्द्रबाट सुरु भएको नागरिकप्रतिको यो उत्तरदायी र नैतिक प्रयासलाई सिंहदरबारभित्र मात्र सीमित नराखी आगामी दिनमा मुलुकभरका अन्य सरकारी निकायहरूमा समेत विस्तार गर्ने सरकारको योजना छ। विगतका सास्ती र कठिनाइलाई सच्याउँदै दीर्घकालीन रूपमा सेवा प्रवाहलाई समावेशी बनाउने यो कदमले लोकतान्त्रिक सरकारको वास्तविक अनुभूति गराउने विश्वास गरिएको छ।
